پولیس ملازمین کے خصوصی بچوں کے والدین میں 15لاکھ روپے سے زائد مالیت کے 66امدادی چیکس تقسیم

لاہور (ایم این پی) سی سی پی او لاہور بلال صدیق کمیانہ کی ہدایت پر ایس ایس پی (ایڈمن) عاطف نذیر نے اپنے دفتر میں پولیس ملازمین کے خصوصی بچوں کے والدین میں 15لاکھ روپے سے زائد مالیت کے 66امدادی چیکس تقسیم کئے۔اس موقع پر انہوں نے کہا کہ سی سی پی او لاہور کی ہدایت پر پولیس ملازمین کے خصوصی بچوں میں ویلفیئر فنڈز کی تقسیم کا عمل جاری ہے۔ایس ایس پی (ایڈمن) نے تقریب سے خطاب کرتے ہوئے کہا کہ پولیس ملازمین کے خصوصی بچوں کی دیکھ بھال ہماری ذمہ داری ہے اوراس ذمہ داری کو ہر قیمت پر نبھائیں گے۔عاطف نذیر نے کہا کہ محکمہ پولیس نے ملازمین کے اہل خانہ کے علاج معالجہ، رہائش گاہوں، بچیوں کی شادی، بچوں کی تعلیم اور ملازمت سمیت ویلفیئر کیلئے مثالی اقدامات کئے ہیں۔ انہوں نے کہا کہ ملازمین کے اہل خانہ کے علاج معالجہ کیلئے تمام ممکنہ وسائل بروئے کار لائے جا رہے ہیں۔ انہوں نے ایک بار پھر اس عزم کا اعادہ کیا کہ شہداء، غازیوں اور خصوصی بچوں کی ویلفیئر کا سلسلہ یونہی جاری رہے گا.